ടിഷ്യു കടലാസ് ഒരലങ്കാരമാണ്
മ്ലേച്ചം
തുടച്ചെറിയുന്നതിനു മുൻപ്
കാറിലും ബഞ്ചിലും
വിമാനത്തിലും
ആപ്പീസിലും,
ഉമ്മറകോലായിലും,ഹോട്ടലുകളിലും
കിടപ്പറയിൽ വരെ
വെളുത്ത ചെടിത്തണ്ട് എല്ലാം
പൊതിഞ്ഞ്
ഞെരിഞ്ഞമരുന്നു.
ചില മുഖങ്ങൾ മിനുക്കിയും
വിയർപ്പുകൾ ഒപ്പിയെടുത്തും
മൂക്കുകൾ ചീറ്റിയെറിഞ്ഞും
കഴുകാത്തവയെ ശുചീകരിച്ചും
‘പാപ്പിറസ് '
ചാവേറുപോലെ പൊങ്ങി വരുന്നു.
ആയിരം നാക്കുകളുണ്ടായിട്ടും
ആയിരം കഥകളുണ്ടായിട്ടും
ചുണ്ടനക്കങ്ങളില്ലാത്ത
വെണ്മകൂട്ടങ്ങളൊഴിഞ്ഞ കൂട്ടിൽ
അവസാന ചാവേറുവരെ
തിരഞ്ഞുപിടിച്ച്
കൊല്ലുന്നുണ്ട് മനുഷ്യൻ..
No comments:
Post a Comment